Serbski institut wudawa „Lětopis” ako interdisciplinarny periodikum na pólu sorabistiskego a humanistiskego slěźenja. Casopis jo se załožył w lěśe 1952. Wón se wudawa wót lěta 2023 online a z pódtitelom „Casopis za sorabistiku a pśirownujuce mjeńšynowe slěźenje”. Pśiwzete artikele wózjawiju se online, kuždy wósebje, a slědkoju teke wšykne gromaźe we śišćanej formje ako lětna publikacija.

Což nastupa awtorstwo a originalnosć, deje pśipósłane źěła se makaś z pśirucenjami DFG k zawěsćenju dobreje wědomnostneje prakse. „Lětopis” wózjawijo jano take źěła, kótarež njejsu se howacej na žednom drugem měsće wózjawili. Dla mócowanja wobeju serbskeju wědomnostneju rěcowu wózjawjaju se how teke pśełožki do dolnoserbskeje a górnoserbskeje rěcy. Wóni su eksplicitnje ako take wóznamjenjone.

Teksty wózjawjaju se pód licencu Creative Commons Namensnennung 4.0 International. Jolic až póžedaśo sebje ako awtor abo awtorka drugu licencu, ga rozgrońśo se z redakciju, lěc jo to móžno.

Wšykne artikele, kótarež su w „Lětopisu“ wózjawjone, su dejali proceduru peer-review pśejś a pśi tom pozitiwne pósuźenje dostaś. Redakcija jo wuzwóliła pósuźowarje z rědu eksternych fachowych kolegow. Jano we wuwześnych padach wuzwólijo wóna kolegi ze Serbskego instituta, kótarež pak njejsu cłonki redakcije. Procedurje peer-review su powdane wšykne teksty we rubrice „Nastawki”. Wušej togo dajo teke rubriku „Materialije” (na pśikład za komentěrowane wózjawjenja dokumentow). Teksty z teje rubriki muse jano wuwześnje proceduru peer-review pśejś.

Publikaciske rěcy su: dolnoserbska, górnoserbska, nimska a engelska rěc kaž teke dalšne słowjańske rěcy, pśedewšym pólska, čechojska a rusojska.