Jako interdisciplinarny periodikum sorabistiskich a duchownowědnych slědźenjow wudawa Serbski institut w lěće 1952 załoženy časopis „Lětopis“, kotryž wuchadźa wot 2023 online a z podtitulom „Časopis za sorabistiku a přirunowace mjeńšinowe slědźenje“. Akceptowane artikle wuchadźeja online jako wosebite wozjewjenja, po tym tež w ćišćanej formje jako lětny zběrnik.

Nastupajo awtorstwo a originalnosć wotpowěduja zapodate dźěła poručenjam DFG k zawěsćenju dobreje wědomostneje praksy. „Lětopis“ wozjewja jenož tajke dźěła, kotrež njejsu hišće na druhim městnje wušli. Zo byštej so serbskej wědomostnej rěči spěchowałoj, jewja so tu tež přełožki do delnjo- a hornjoserbšćiny. Wone su eksplicitnje jako tajke woznamjenjene.

Teksty wozjewjeja so pod licencu Creative Commons Namensnennung 4.0 International. Jeli Wy sej hinašu licencu přejeće, wujasniće prošu z redakciju, hač je to móžno.

W „Lětopisu“ wozjewjene artikle su dóstali pozitiwne posudźowanje přez proceduru z peer-reviewom. Redakcija wuzwoli za posudźowanje po double-blind-procedurje eksternych fachowych kolegow. We wuwzaćnych padach postajeja so kolegojo Serbskeho instituta, kotřiž njepřisłušeja redakciji Lětopisa, zo bychu peer-review přewjedli. Přez peer-review su wšitke teksty pruwowane, kotrež so w rubrice „Nastawki“ jewja. Nimo toho eksistuje rubrika „Materialije“ (na př. za komentowane publikacije dokumentow). Za nich je procedura we wobłuku peer-reviewa jenož we wuwzaćnym padźe trěbne.

Publikaciske rěče su delnjoserbšćina, hornjoserbšćina, němčina, jendźelšćina kaž tež dalše słowjanske rěče, předewšěm pólšćina, čěšćina abo rušćina.